الرئيسية / مقالات وآراء / ازاي اخلي البيت سعيد مع جوزي واولادي

ازاي اخلي البيت سعيد مع جوزي واولادي

ازاي اخلي البيت سعيد مع جوزي واولادي هذه تجربة واقعية من سيدة متزوجه تقص ما قامت به من اجل بيت سعيد مع الزوج والتحديات التي كانت تواجهها واليكم القصة مع مشكلة وازاي حلاها.

ازاي اخلي البيت سعيد مع جوزي

السلام عليكم جميعا
على غير المعتاد هبعت مشكلتي ومعاها الحلول اللي ربنا وفقني ليها الحمد لله وحياتي اتغيرت تمامااااااااااااا
بعد ماكانت الحياة كلها مشاكل ونكد
وكانت كأنها الجحيم بعينه، وخلاص قررنا ننفصل
بس استحملوني شوية ف التفاصيل لانها مهمة
انا عندي ٢٨ سنة وعندي طفلين بنت ٧ سنين وولد ٤ سنين.

السعادة مع الزوج

اتربيت على القيم والمبادئ والحلال والحرام رغم أن كان حالنا بسيط اوي بس بابا كافح وكان بيرفض الحرام دايما حتى لو مغري
لحد لما كلنا كبرنا ومننا الدكتور والمدرسة والمحاسب وانا خريجة كلية قمة
اتقدملي زوجي وكان ف بلد تانية فاخذنا بالاسباب وعجبنا اوي أنه متدين
وتم الزواج، هوا فيه صفات كويسة كتير لكن للأسف كنا مختلفييين جدا
ف كل حاجة ، وعيشت معاه ف بيت العيلة رغم أنه مش كان اتفاقنا في
مع ناس النفاق اسلوب حياتهم ومعاملة غير آدمية بالمرة كل دا طبعا كان بيضغط على اعصابي..ولاني كنت حريصة على صورته قدام اهلي عمري ماحكيت على حاجة …ودا كان مزود الضغوط عليا اوي.

قصة حقيقة عن المشاكل بين الزوجين

مشاكلنا مش بتخلص، وخلاف على كل حاجة
بقيت علطول عصبية واطلع زهقي على ولادي طبعا
واضرب بنتي عشان تحفظ وتذاكر لأنها كانت بتحب تلعب كتير
لحد ماف يوم سمعتها ببراءة شديدة بتقول لبنت خالتها
انا بحب ماما وبابا اوي بس نفسي يبطلوا الخناق انا بزعل اوي وبخاف
زعلت من نفسي اوي وابتديت افكر
ولقيت إن لازم الوضع دا يتغير لازم أواجه مشاكلي
ابتديت اشوف حياتي بشكل تاني …..حتى جوزي نفسه
الله انا حياتي فيها حاجات حلوة اوي بس انا مش عارفة أشوفها كويس
قعدت معاه قعدة طويلة وبهدوء وصلنا لحلول وسط ف مشاكلنا الأساسية
كويس نصف حل افضل من لاشيء

طريقة تربية الاولاد بعد منع الضرب

غيرت طريقتي مع ولادي بدل الضرب والزعيق بقيت اشجعهم
والعب معاهم وحضنهم……بقوا يحفظوا اكتر وبقوا اشطر لوحدهم
النت اللي بياخد جزء كبير من وقتي ….بقيت استغله ف حاجات احسن
فيديوهات تدي طاقة ايجابية، اتعلمت حاجات مفيدة لبيتي
دورت على راديو قديم ….وشغلت إذاعة القرآن معظم الوقت
بقينا نخرج كل اسبوعين حتى لو مفييييش فلوس
اعمل اكل من البيت وترمس شاي والعيال تلعب وتخرج الطاقة اللي جواها، واحنا كمان نخف الهم من على قلوبنا
لو معرفناش نخرج ممكن نتجنن ونشغل اغنية ونقعد نسقف ونهيص مع العيال ونعمل لوووووووووولي فرح ، حتى لو الناس حتقول علينا مجانين
الوقت اللي احنا فيه مع بعض مش هيتعوض حررررام نخلي الهم والنكد متمكن مننا
اللي يقرب منك خطوة قرب منه خطوتين وافتحله وافتحله دراعاتك
وابدء بنفسك مهما كانت مشاكلك والله والله عندك برضه حاجات حلوة
ولكل مغنم مغرم
بنتي كل شوية تقولي ارجوكي ياماما بلاش تعملي زي زمان تاني
كدا احلى بكتير
ربنا يصلح احوالنا يااااارب ويديم علينا نعمه

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *