الرئيسية / مقالات وآراء / الزواج تم ثم شقة ايجار بسبب السفر من الزوج ومشكلة بين ابي وزوجي على الشقة والعفش

الزواج تم ثم شقة ايجار بسبب السفر من الزوج ومشكلة بين ابي وزوجي على الشقة والعفش

الزواج تم ثم شقة ايجار بسبب السفر من الزوج ومشكلة بين ابي وزوجي على الشقة والعفش، هذه ليست قصة تكاليف  الزواج او شيء بعد اذنكم كان عندى مشكله وعاوزه اخد رأيكم فيها وياريت نصيحة اعمل ايه وأحل الموضوع ازاى.

بداية سفر الزوج

انا متزوجة من 3 سنين ومعايا بنوته وكانت حياتى مستقرة جدا مع جوزى وبنتى وكنا عايشين ف شقه ايجار. جوزى جاله عقد عمل بره واضطر انه يسافر. وبصراحة اتفق معايا على أن مينفعش أعيش ف الشقة لوحدى انا وبنتى من غيره .علشان مفيش أمان وفى نفس الوقت مستحرم يدفع ايجار شقه واحنا مش قعدين فيها لأن الإيجار كان غالى .

شقة ايجار للزواج فيها

فاتفق معايا ننقل العفش ف شقه إيجارها بسيط كمجرد مخزن للعفش. وأنا كده كده أتفق معايا اقعد عند أهلى. ولما ينزل الإجازة بتاعته الشهر ف السنه نبقى نأجر شقه مفروشة وبعد كده يسافر. وهيفضل الحال ده هيتكرر لحد ما ينزل نهائى. النهائى ده امتى الله أعلم. على العلم أنه مش هيقدر يخدنى معاه بسبب المعيشه هناك صعبة جدا والسكن غالى وكل حاجة غاليه وبيقولى مش هعرف احوش حاجه. ده كله وانا سمعت كلامه فيه. سبت شقتى وركنت عفشى ف شقه بسيطه وفعلا قعدة عند أهلى وبينزلى الشهر ف السنه.

الاب رفض الشقة الإيجار

دلوقتى والدى لما عرف تصرفاته دى اتخانق معاه جامد اللى هو ازاى تقعد بنتى من غير شقه وتخزن عفشها وتبعتها عند أهلها. اللى هو مين سمحلك تتصرف كده من غير ما ترجع لأهل مراتك. ودلوقتى والدى قالى الزياره أو الإجازة اللى جايه لجوزى مش هتروحى معاه غير لما يجبلك شقه ويحطلك عفشك فيها. وجوزى رافض بيقولى علشان مينفعش مراتى وبنتى يقعدوا لوحدهم كده ف شقه ومعدتش فيه أمان ووممكن ف اى وقت يحصل حاجه للبنت ومتعرفيش تتصرفى بيها علشان هى لسه صغيره. ولو حصل وجبلى الشقة هيضطر يخلى مامته وبباه يقعدوا معايا علشان يخلوه بالهم منى ويبقى فيه ونس معايا ف الشقة. وطبعا انا مش حابه كده. مينفعش أهله يقعدوا معايا لأنهم بيعملوا مشاكل كتير. دلوقتى عاوزة حل يقولى أتصرف ازاى. وعاوزه اعرف موقف جوزى ده صح ولا غلط. ولو حد أتعرض لتجربة زى دى. اقدر ازاى يتأقلم مع وضع زى ده. وازاى أقنع والدى بالحل علشان ميحصلش مشاكل بينه وبين جوزى كبيرة.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *