الرئيسية / موضوع / هو لازم نيش في جهاز العروسة والعريس

هو لازم نيش في جهاز العروسة والعريس

هو لازم نيش في جهاز العروسة انا مش عايزه اجيب نيش في الجهاز بتاعي ممكن نتفق مع العريس على كده لان النيش بيعمل زحمه في البيت وبعدين مصاريف على الفاضي و محدش بيستخدمه مش عايزه احس ان انا الوحيده اللي عملت كده لاني دلوقتي في كثير من البنات مش بتجيب النيش

هو لازم نيش في جهاز العروسة

انا كنت زيك مش طايقه النيش ومش عايزاه ولظروف الزواج كل حاجه جت بسرعه ولقيت نفسي بقول لجوزي اعمل اقل نيش اللي هو ثلاث ضرف وبكده فعلا انا عندي نيش بس مش مليان لا بالعكس في حاجات بسيطه وضروريه في البيت.

والله يا بنتي انا كان قدامي أتنازل عن حاجه من الاتنين المساحه اتنازلت عن البوفيه وقلت النيش هيبقي اصغر فمش هغلب لما افرش السفره اؤيدك …انا مبحبش الكركبه.

ياريت كُلنا نقرأ الكلام ده للآخر !

– اللى قرر ان ماينفعش ولد يتجوز بنت اكبر منه ، هو نفسه اللى قرر إنه ماينفعش ولد يتجوز بنت اطول منه .. هو نفسه اللى قرر انه لازم الولد يتجوز البنت بيضا وحلوه ورفيعه ، وإلا تبقى معيوبه .. هو نفسه اللى قرر ان البنت ماينفعش تتجوز قبل اختها الكبيره

-هو نفسه اللى قرر ان فـ حاجه اسمها كليات قمه اللى دخلها ماجبتوش ولاده ، حتى لو داخلها أصلآ بفلوس ابوه .. هو نفسه اللى قرر ان الراجل برستيجه فـ شهادته والـ title بتاعه فى الشغل حتى لو طموح وشاطر وشيك وبيكسب كويس !

– هو نفسه اللى قرر ان الشياكه بدله وجزمه بكعب .. هو نفسه اللى قرر ان النيش و ومحتوياته أهم من العريس نفسه .. هو نفسه اللى قرر ان القايمه هي اللى هتحافظ على البنت من المرمطه ، وهو نفسه اللى قرر ان العريس لو شقته مش تمليك يبقى مايلزمناش

– هو نفسه اللى قرر ان العروسه لازم تلبس فستان بالآف الجنيهات لمده ساعتين ، والعريس يلبس بيبيون يبقى هيموت منها عشان يبقى شكلهم حلو .. هو نفسه اللى قرر ان الفرح لازم يبقى متكلف جدًا ، والعريس والعروسه يقضوها رقص قدام الناس ، وإلا يبقى فرح وحش

-هو نفسه اللى قرر ان الصالون بتاع الضيوف يبقى مساحته نص الشقه ومكتوب عليه ممنوع اللمس .. هو نفسه اللى قرر أننا ماينفعش نتجوز وفى شوكه ناقصه فى البيت .. هو نفسه اللى قرر ان كل ماتجيلك فلوس حوشيها واشترى دهب وألماظ ولو سافرتى واتبسطى بيها تبقى هبله ، ومش عارفه مصلحتك

– هو نفسه اللى قرر أننا ماينفعش نسمي ولادنا اسم إحنا بنحبه لمجرد انه ” منتشر ” .. هو نفسه اللى قرر ان الراجل اللى يساعد مراته فـ البيت مراته هتتمرع عليه .. هو نفسه اللى قرر ان المطلقه او الأرمله مواطن درجة تانيه ملهاش نفس حقوق الأولى ؛ وسهل الإستغناء عنها والتلاعب بمشاعرها

-احنا بقينا بنلبس ، ونتجوز ، وندرس ، ونشتغل عشان احلام وقرارات وطموحات ناس غيرنا ، تابوهات لو الأجيال الجديده مش هتغيرها وتطلع بره الصندوق هيفضل اللى بيسموه المجتمع او العُرف ده ياخد قرارات لحد ما يوصلك انك تبقى إنسان آلى ممسوخ بتتجوز وتعيش بالريموت كنترول !

اترك تعليقاً

لن يتم نشر عنوان بريدك الإلكتروني.