الرئيسية / موضوع / قصة حقيقية : ابني ولعبة الحوت الأزرق

قصة حقيقية : ابني ولعبة الحوت الأزرق

لعبة_الحوت_الأزرق
الحقيقه انا مش أب مثالى أوى لكنى بحاول دايما أشارك أولادى فى اوقات سعادتهم وده لسببين أولا لأن دى حاجه بتفرحهم أكتر وثانيا لانى مدرك تماما إن سنين طفولتهم دى مش هتتعوض تانى وبكره الدنيا هتاخدهم وهتمنى حد فيهم ييجى يقعد جنبى نلعب بلاى ستيشن زى دلوقتى ومش هلاقى وقتها , وبصراحه فيه سبب تالت مستتر هوه انى بعيش طفولتى معاهم من جديد وبكون مبسوط جدا وانا بعمل كده اللى هوه مش بلعب مضطر لأ ده انا بحاول أكسبهم بالطرق الشرعيه وغير الشرعيه و بتخانق عالكبيره والصغيره وبزعل وآخد جنب لو خسرت يعنى دماغى صغيره اوى وعيل جدا فى اللعب ..

من حوالى شهر تقريبا ابنى جه يحكيللى عن لعبة شالنج جديده إسمها الحوت الازرق وقعد يحكى ويحكى وهوه متأثر ومنفعل جدا وانا لأنى كنت مشغول ساعتها فبغباء شديد سمعته بعدم تركيز وماانتبهتش لكلامه وكل اللى فهمته انها لعبة صعبه وخلاص فمشيت وسبته وانتهى الموضوع .

لحد ما من كام يوم قريت خبر مرعب دخل فى عينى وقلبى وهوه ان ابن النائب حمدى الفخرانى انتحر بسبب لعبة اسمها الحوت الازرق ! جسمى اترعش ورجعت بالذاكره لكلام ابنى ,جريت اتصلت بيه اسأله عن اللعبه دى وهل لعبها فجاوبنى انه خايف يلعبها بس عنده فضول رهيب ليها وانه كان عايز يستشيرنى بس انا مااديتلوش فرصه فحمدت ربنا انها عدت على خير وبدأت اعمل سيرش عن الموضوع بتوسع فـ لقيت عجب العجاب من الرسائل اللى جاتلى على الانبوكس ومن حكاوى ناس بعضها مؤكد وبعضها سماعى فتعالوا اشرحلكم الموضوع بالتفصيل عشان الكل ياخد حذره لانه موضوع جد خطير ومش هزل ابدا ….

ق

دى لعبه انتشرت فى العالم الفتره الاخيره بتتلعب بمنتهى السهوله على الفيسبوك وغالبا ضحاياها هما الاطفال والمراهقين الصغيرين وفكرتها ان سيادتك بتدخل تحدى مع الادمن اللى هوه شخص بيتكلم معاك فى الشات وبيديك تعليمات محدده بتكون عباره عن خمسين أمر تحدى فى مدة خمسين يوم بواقع تحدى واحد او أمر واحد كل يوم , فى البدايه بيسألك هل تقبل التحدى فلو جاوبت بنعم بيبدأ يفهمك انك لازم تطيع الاوامر وبيطلب صورتك وبيتأكد من شخصيتك وبيقولك قواعد التحدى وبيبدأ يبعتلك الاوامر فى تمام الساعه اربعه وتلت فجر كل يوم وبتكون اوامر سهله فى البدايه جر رجل وجس نبض يعنى وكمان فى الفتره دى بيبعتلك ملفات ضاره بمجرد ماتدوس عليها بيخترق كل اجهزتك سواء موبيل او كومبيوتر…بعد كام يوم بيبدأ يطلب منك اوامر اصعب زى انك تنقش بالموس على جسمك رمز الحوت او تنقش رمز f57 وطبعا كل مرحله بتعملها لازم تصورها وتبعتهاله عشان يتأكد ويخلييك تكمل.. بعد كده بيزود الجرعه شويه وبيبدأ في مرحلة الايذاء النفسى وفيها بيطلب منك تحديات مرهقه نفسيا زى انك تروح المدافن بلليل لوحدك او تطلع تقعد فوق سور السطح وتدلدل رجلك في الشارع وطبعا بتصور بالفيديو كل ده وبيتابعك عشان يتأكد .. بعد كده بيدخل على المراحل الخطيره اللى فيها بيجهز الضحيه للانتحار ودى مراحل تبويظ الاعصاب فبيطلب منك انك تشوف أفلام رعب كتير وتسمع موسيقى ميتل صاخبه جدا وتنعزل عن الناس تماما ماتكلمش حد لايام وماتكلش الا اكل محدد واذا حضرتك نفذت الأوامر دى فبكده بتكون جاهز جزئيا للمرحله الاخيره اللى بيعشمك بيها وهيه مقابله الحوت الأزرق وبيطلب منك في المراحل القبل الاخيره انك تأذى غيرك بشكل او بأخر زى ابوك واخواتك واصحابك وانك تاخد أنواع مخدرات بيحددهالك وادويه معينه بيقولك عليها فاذا نفذت ده بكده حضرتك بتكون جاهز تماما لمرحلة مقابله الحوت واذا تراجعت بيبدأ يهددك بقتلك وقتل عيلتك بالاسم بناءا على المعلومات اللى اخدها من تليفونك وجهازك لما اخترقه وطبعا حضرتك بتخاف وتكمل فبيدخل على المرحله الاخيره وفيها بيطلب منك الانتحار بشكل مباشر او غير مباشر يعنى مثلا ممكن يطلب منك ان تروح على قضبان القطر تنام ليله هناك او تقفز من ارتفاع اربع أدوار مثلا او تقطع شرايين ايدك او تمسك سلك كهربا عريان او تشرب سم او تبلع حبوب بكميات مميته وتحت تأثير الضغط العصبى الرهيب اللى انت فيه من شهرين والحاله النفسيه السيئه اللى وصلت ليها غالبا بتنفذ الامر ده بكل انقياد وتبعيه وبكده بتنتهى اللعبه وبتنتهى حياتك بمنتهى البساطه وسط غياب تام من الاهل اللى للأسف بيكونوا نايمين في العسل ومشغولين بالفلوس وناسيين ان فيه حاجات عمر ما الفلوس هتقدر تعوضها …
الموضوع ده عامل قلق في العالم من فتره وللأسف بدأ ينتشر في مصر والبلاد العربيه واحنا ولا هنا فياريت تاخدوا بالكم من نفسكم ومن عيالكم ومن اخواتكم الصغيرين وتحاولوا تنشروا الخطر ده عشان الكل يفهم وياخد حذره ويحذر غيره ويارب سلم الجميع …

#منقول_من_محمد_دويدار.

اترك تعليقاً

لن يتم نشر عنوان بريدك الإلكتروني.