مشكلة مع أهل خطيبتي بسبب السفر وتعتبر مشكلة اساسية مع خطيبتي اللي كانت هتصير زوجتي، أهل خطيبتي تدخلوا بقوة وبظلم معي بسبب المال او المصايف وتعتبر قوة مشكلة خطيبتي مع الشقة ونكتبها باسم مين والقصة كلها كالتالي.
مشكلة مع أهل خطيبتي
بعد اذنكم محتاج رايكم فى مشكلتى لان نفسيا تعبان ومش عارف انا صح ولا غلط
ربنا شاهد على كل كلمه كاتبها
من 5 سنين كنت شوفت بنت فى مناسبه والمهم شوفتها فى مناسبه تانى بعدها شهور وسالت عليها واتكلمت معاها وبدات اتواصل معاها عن طريق النت والفون لمدة سنتين ارتبطنا ببعض جدا جدا وانا طبعا وعدتها انى لما ظروف تتحسن وتكون مناسبه هاروح اتقدملها وفعلا روحت اتقدمتلها طبعا قابلت اهلها واتفقت معاهم وعرفتهم انى انا محدش بيساعدنى وانى بكون نفسى من الالف للياء وطبعا خال البنت بلغنى برفضه وقالى احنا موافقين عليك لشخصك وقال كلام شيك جدا وكويس جدا فى حقى.. بس مرتبك مش هايقدر يعيشوا بنتنا كويس وهى مينفعش يترفض ليها طلب .. طبعا وقتها كان راتبى 3500 جنيه .
مشكلة المرتب مع اهل خطيبتي
المهم اتكلمت مع البنت بعدها وعرفتها انى لسه عاوزها وشاريها ومنتظر ظروفى تكون افضل بالنسبه لاهلها … طبعا هى فضلت تقولى افضل حل انك تسافر ..
بعد سنه بالظبط جاتلى فرصه سفر وقبل ما اسافر روحت كلمت اهلها وعرفتهم انى ظروفى اتغيرت وانى مسافر بعد شهرين واتقدمت ليها تانى … وافقوا وعملنا خطوبه … واحنا بنتفق قولتلهم انى هارجع بعد سنه واخد شقه ايجار وخلال السنه ده اكون جبت العفش والحاجات الى عليها … ام البنت رفضت وقالتلى بص انت هاتجيب شقه تمليك والفلوس الى كنت هادفعها لبنتى فى حاجات حطها مع الفلوس الى كنت هاتجيب بيها العفش واشترى شقه تمليك وتكتب العقد باسمك انت وبنتى ولما تتجوز ابعت خد مراتك معاك وشطبوا وافرشوا الشقه براحتكم ومش عاوزين قايمه .
مشكلة الهدايا مع خطيبتي
طبعا وقتها وافقت عشان اوصلهم انى شارى بنتهم ومش ده الحاجه الى هاتبوظ الدنيا … طبعا بعدها انا سافرت والدنيا كانت ماشيه معايا كويس وعمرى مكنت مقصر معاها او حتى مع اخواتها البنات حتى وانا مسافر فى اى مناسبه وغير مناسبه كنت ببعتلها هدايا .. بعد 6 شهور بالظبط حصل شويه ظروف معايا خلتنى مقدرش ابعتلها هديه فى عيد الاضحى .. رد الفعل وقتها كان صعب جدا عليا انها قالتلى انت بخيل والهدايا الى بتجبها مش واوو .. وقتها نفسيتى تعبتنى جدا وفضلت زعلان منها حوالى اسبوع رجعت كلمتنى وصالحتنى واعتذرت والدنيا مش كويس … المهم جيت كلمت طبعا اهلها وبقولهم احنا عاوزين نشترى الشقه بحيث زى مكنا متفقين انهم هايحطوا تمن حاجات بنتهم معايا فى الشقه … لاقيتهم قالولى احنا هندفع مبلغ … طبعا المبلغ ده انا لاقيته قليل جدا جدا لانى كنت من سنه اختى متجوزه ومجهزينها وحاجاتها جت بمبلغ اكتر من كده.
الشقة خلاف في فترة الخطوبة
طبعا انا سمعت منهم المبلغ ومتكلمتش خالص وقولتلهم خلاص مفيش مشكله وظبط معاهم ميعاد عشان ينزلوا يدفعوا فلوس الشقه … لاقيتهم كلمونى وقالولى احنا هندفع المبلغ ده انت بقا هتدقع ايه وقتها قولتلهم انا هاشترى شقه ب 150 الف طبعا لاقيتهم بيقولولى لا كده الشقه كلها تكتب باسم بنتنا لاننا افتكرناك هاتجيب شقه ب 300 الف او اكتر قولتلهم ازاى انا كل الى سافرته هى سنه وكنت بكون نفسى من الصفر وبعدين انا لسه الشقه ال ب 150 الف ده طوب احمر هاصرف عليها زيهم تشطيب غير انى هاجيب فرش شقه كامل من الاول للاخر…
طبعا لاقيتهم مصممين بشكل غريب انى اكتب الشقه كلها باسم بنتهم ومره يقولولى هنكتب تلت الشقه باسك و الباقى ليها .. المهم قولتلهم يا جماعه انا متفق مع راجل لو فيه اى تغير ممكن هو يتكلم ونتفاهم مع بعض … طبعا هما مخليين خطيبتى ضاغطه عليا بشكل غير عادى وزعل ونكد وكل ده عشان اوافق على كده ..انا رفضت واتمسكت بالى اتفقت عليه من الاول … المهم خال البنت كلمنى وقالى بص خلاص انت هات الشقه واكتبها باسمك انت وخطيبتك واحنا مش هنديك الفلوس زى الاول …شطب شقته وبعد ما تشطب شقتك احنا هنشترى حاجتها ونحطها فى الشقه …انا وافقت على كلامه فى الاخر بس طبعا قبلها هو كان رفض كل الحلول الى قولتها (قولتله اجيب شقه ايجار واجهز حاجتى وانتو هاتوا حاجتكم ونعمل قايمه زى الطبيعى قال لا – قولتله خلاص اخد شقه تمليك وعشان ننهى موضوع النص و التلت وكده هاعملكم قايمه مكتوب فيها كل الحاجات الى فى الشقه ضمان لحق بنتك زى منتا عاوز وكده كده هاجيب الحاجات ده لانى ملزم بيها خلاص فى القايمه قالى لا ) .
المهم الوقت قرب وبقى فاضل على فرحى 4 شهور لاقيتهم كلمونى وقالولى احنا عاوزين الشقه تكون جنبنا وفى منطقتنا وبنتنا مش هتسافر معاك لما تتجوز عشان ام البنت تعبت وعاوزه عيالها جنبها هما للعلم مش من القاهره … انا من القاهره وكنت متفق معاهم انى شقتى هتكون على حسب مكان شغلى ومدام شغلى فى القاهره يبقى انا هاخد فى القاهره … طبعا انا رفضت موضوع الشقه انى اخدها جنبهم وقولتلهم انا على اتفاقى ومعرفكم ده من البدايه فى موضوع الشقه اما بالنسبه لبنتكم مفيش مشكله انها تقعد مع مامتها مع انى ده صعب عليا وخصوصا انى متغرب ومحتاج مراتى معايا … بعد قرب ميعاد فرحى وباقى عليه شهرين وكنت بتكلم مع خطيبتى وبنظبط حوار الكوافير والفستان .. وقتها خطيبتى طلبت حاجات معينه وكانت الحاجات ده غاليه جدا عليا بس ضغط على نفسى ووافقت لما حسيت انى ده هايفرحها … واحنا بنظبط قولتلها بصى الفلوس الى معايا مش هتعمل فرح كويس بالدرجه الى احنا عاوزينها فالافضل نعمل كتب كتابنا فى مسجد الرحمن الرحيم او اى مكان يكون شيك وكويس تانى وبدل ما كنا هنسافر اسبوع نسافر اسبوعين طبعا وافقت وام كانت موافقه فى الاول على ده .
مكان الشقة أثناء الخطوبة
ظبطنا كل حاجه انا وهى … بس اتفاجاءت بعدها بكام يوم لاقيت اختها بتكلمنى وبتقولى بص الشقه لازم تجيبها فى مكان كويس ويعجبنا كلنا ولازم تعمل فرح واختى هتسافر معاك ومش هاينفع تتجوز اسبوعين ولا تلاته وتسافر وتبعت لاختى اسبوعين او تلاته قليل ومرفوض والمؤخر هايتكتب كذا … المهم قولتلها انا كلامك ده رايك ولا راى اخواتك وخالك ومامتك قالتلى انا بكلمك هما سامعين بالنسبه للفرح مفيش مشكله بس انا كنت حابب بدل ما اعمل فرح عادى قولت الافضل اعمل كتب كتاب كويس جدا … بالنسبه انى ابعتلها تيجيلى قولتلها مفيش مشكله عندى مع انى للعلم انتو الى قولتو ليه انها مش هتسافر ليا … لكن بالنسبه للاسبوعين او التلاته انا معرفكم من قبل ما اسافر انى اجازتى شهر فقط ومش هاقدر اخد اكتر من كده .. بالنسبه للمؤخر معنديش مشكله فى الرقم مع انه اكتر من 8 اضعاف الى المبلغ الى كنت مبلغكم بيه بس الفكره كلها حرام ادفع للماذون بس 12 الف جنيه … وانا اساسا عمال اظبط امورى بالعافيه وده كده فوق فوق مقدرتى …. لاقيتهم بيقولولى احنا مصممين على الى بنقوله .. طبعا فضلت اكتر من ساعتين على الفون عمال اتحايل واقنع فيهم ومفيش اى فايده حتى كلمت خطيبتى عشان نحاول نوصل لحل ولا اديتنى اى حل تقولى اعمل الى انت عاوزه .
فسخ الخطوبة ورد الشبكة
حصل بعدها انهم طلبوا رقم حسابى عشان يبعتوا تمن الشبكه انا فضلت يومين ساكت متكلمتش قولت يمكن حد يكلمنى لكن مفيش اى حد كلمنى وانا من حرقه دمى وزعلى بعت رقم حسابى وبعتولى تمن الشبكه بس خطيبتى بعدها بتقولى انت بعتنى وحسبى الله ونعم الوكيل فيك .وهكذا تم فسخ الخطوبة ورد الشبكة في نهاية الخطوبة، ما رأيكم.